África substitúe Rusia como principal provedora de gas fósil a Galicia
África foi a principal provedora de gas fósil licuado a Galicia durante 2024. Dos 32 buques metaneiros descargados na planta de regasificación de Reganosa en Mugardos, 10 procederon de Alxeria e 7 de Nixeria.
O continente africano foi historicamente o principal subministrador de gas natural a Galicia. Coa irrupción deste combustíbel fósil no noso sistema enerxético a partir da década de 1990, Galicia reforzou a súa participación no espolio enerxético de África e do Sur global en xeral.
En 2024 África recuperou o protagonismo como fornecedor de gas fósil a Galicia que perdera nos últimos anos en favor de Rusia e dos EUA.
Chama a atención o elevado e inusual número de metaneiros con orixe en Alxeria, de onde Galicia pode recibir gas fósil tamén a través da rede ibérica de gasodutos. Esta é unha opción menos mala para o clima, dada a maior pegada de carbono do gas fósil licuado sobre o gas de gasoduto. No entanto, a regasificadora de Mugardos é a única ou a principal vía de entrada, segundo os anos, do gas fósil en Galicia.
Convén lembrar que Sonatrach, a empresa enerxética estatal alxerina de hidrocarburos, é accionista da empresa galega Reganosa (11,74%), controlada polo Grupo Tojeiro e participada tamén pola Xunta.
Gas de “fracking” desde os EUA
Despois de África, os EUA son a principal orixe dos metaneiros descargados na regasificadora de Mugardos en 2024. 10 metaneiros procederon dos EUA, a cifra máis alta desde que en 2016 Galicia comezou a importar gas fósil desde os EUA, grazas ao desenvolvemento do “fracking” (2).
A técnica do “fracking”, prohibida en España, ademais de degradar o territorio leva asociadas importantes fugas de metano, o que agrava o impacto climático do gas fósil, que mesmo pode igualar ou superar o do carbón.
Grazas a Reganosa, Galicia foi pioneira en Europa na importación de gas fósil estadounidense de “fracking”.
En 2024 caeron drasticamente as importacións de GNL desde Rusia. Iniciadas en 2018, acadaron un máximo en 2023, con 20 barcos descargados en Mugardos. Porén, o ano pasado só se descargaron dous barcos.
Máis metaneiros pero menos gas natural licuado que en 2023
Malia que cómpre reducir drasticamente as emisións galega de gases con efecto invernadoiro, o ano pasado bateuse o récord de metaneiros descargados na planta de regasificación de Mugardos. Superouse por primeira vez a barreira dos 30 desde a súa entrada en funcionamento en 2007.
Aínda que chegaron máis metaneiros, a entrada total de gas por Reganosa baixou o 21% con respecto ao ano anterior, no que se atinxiu o pico histórico (3).
Ademais dos países xa citados, tamén subministraron gas fósil ao noso país en 2024 Trindade e Tobago (2 metaneiros) e Qatar (1).
Case todo o gas importado por Galicia destínase ao consumo interno, reexportándose unha pequena parte. O atraso na transición enerxética fixo que o consumo galego de gas fósil aumentase o 41,5% entre 2016 e 2022, experimentando un forte crecemento cando xa debería estar a diminuír rapidamente (4).
Fin do gas antes de 2035
A plataforma Galiza sen gas defende o fin do uso de gas fósil na produción eléctrica antes de 2030 e no resto dos sectores antes de 2035. Obxectivos realizábeis mediante a redución do consumo de enerxía e o desenvolvemento das enerxías renovábeis de forma respectuosa co territorio, coa biodiversidade e con protagonismo cidadá.
Notas
- El sistema gasista español. Informe 2024. Enagás (https://www.enagas.es/es/sala-comunicacion/publicaciones/informe-sistema-gasista-espanol/).
- O “fracking” ou fracturación hidráulica consiste en inxectar grandes cantidades de auga, area e produtos químicos tóxicos en formacións xeolóxicas a alta presión para extraer petróleo e gas.
- Datos procedentes da Corporación de Reservas Estratéxicas de Produtos Petrolíferos (CORES) (https://www.cores.es/es/estadisticas).
- Segundo o Instituto Enerxético de Galicia (INEGA), en 2022, ano máis recente con datos, o consumo atinxiu 1.854 ktep (miles de toneladas equivalentes de petróleo), cifra un pouco inferior ao pico acadado en 2021, que ascendeu a 1.931 ktep.
