Rexeitamos a iniciativa do PP a favor da central de carbón das Pontes
(10 de setembro de 2019). A proposición non de lei do PPdeG a favor da central térmica de carbón das Pontes que se debaterá mañá 11 de setembro no Parlamento galego revela unha absoluta irresponsabilidade fronte á emerxencia climática global.
A defensa do mantemento da actividade dunha das maiores fábricas de crise climática de toda a UE, causante de máis da cuarta parte das emisións totais de Galicia (1), é incompatible co máis elemental compromiso climático.
A plataforma “Galiza, un futuro sen carbón” pide a todos os grupos parlamentarios da oposición que voten non á iniciativa do PP, que só busca atrasar aínda máis a urxente transición enerxética. O PPdeG non quere unha transición enerxética xusta e ordenada, senón interminable e á medida do interese de grandes empresas como Endesa, dona da central de carbón das Pontes.
Acelerar a crise climática ou a transición enerxética?
A iniciativa do PP non propón medidas de protección dos traballadores, senón axudas económicas e exencións fiscais a demandar ao Goberno estatal para favorecer a xeración de cambio climático na central de carbón das Pontes. Esta será a única activa en Galicia despois do peche da central de Meirama en 2020, decidido pola súa propietaria Naturgy.
Como amosa o noso informe O prezo do carbón é posible, alén de urxente e necesario, o peche planificado da central de carbón das Pontes, a máis tardar en 2025. Esta central eléctrica, con xa 40 anos de actividade, é a industria situada en Galicia que provoca maior impacto ambiental negativo dentro e fóra do noso territorio.
Salienta especialmente pola súa achega á crise climática. En 2018 volveu estar entre as 20 maiores industrias emisoras de dióxido de carbono (CO2) da UE. Unhas emisións que non reducirá a reforma da que está a ser obxecto para se adaptar, con catro anos e medio de atraso, á Directiva de Emisións Industriais (DEI), que non afecta ao CO2 , principal gas de efecto invernadoiro causante de cambio climático.
O “parón” das centrais de carbón non é consecuencia da política enerxética estatal
A caída da produción eléctrica nas centrais de carbón galegas rexistrada nos últimos meses non é consecuencia “dunha política enerxética desordenada por parte do Goberno de España”, como sostén o PP. Está motivada sobre todo pola suba do prezo do CO2 que están obrigadas a comprar no mercado europeo de emisións, responsable tamén dun descenso paralelo da produción eléctrica con carbón no resto da UE.
O mercado europeo de emisións creouse en 2005 para penalizar especialmente industriais extremadamente intensivas en emisións de CO2 como as centrais eléctricas de carbón. Sen embargo, até hoxe, en poucos períodos ten amosado un mínimo de eficacia.
2019 pode ser o ano con menores emisións de GEI en Galicia desde 1990
Endesa prevé que este ano a produción de electricidade na central de carbón das Pontes baixe desde os 8.000 GWh do ano pasado aos 2.600 GWh. Un descenso así provocaría unha baixada importante das emisións totais galegas causantes de cambio climático, superiores ás emisións medias de España e da UE en termos per cápita. 2019 será probablemente o ano con menores emisións das últimas décadas, cando menos desde 1990.
Nota
(1) En 2017, último ano con datos oficiais, as emisións totais de gases de efecto invernadoiro en Galicia ascenderon a 30,2 millóns de toneladas. A central de carbón das Pontes emitiu no mesmo ano 8,1 millóns de toneladas de CO2, o que supón o 26,8% das emisións totais.
